Samvaidhanik Patni संवैधानिक पत्नी

बेलायत निवासी डायोस्पोरिक साहित्यकार कृष्ण बजगाईं विगत २१ वर्षदेखि नेपाल बाहिर रहेर नेपाली भाषा साहित्यको सेवा गरिरहनु भएको छ । समकालीन साहित्य प्रतिष्ठान बेलायतका संस्थापक अध्यक्ष, प्रवासन अनुसन्धानमूलक अन्तर्राष्ट्रिय जर्नलका प्रधान सम्पादक, विगत १४ वर्षदेखि समकालीन साहित्य (samakalinsahitya.com) नामक साहित्यिक वेब पत्रिकाको सम्पादन तथा प्रकाशन गरिरहनु भएको छ । विभिन्न राष्ट्रिय तथा अन्तर्राष्ट्रिय साहित्यिक संघसंस्थाको नेतृत्व तहमा रहेर कार्य गर्नु भएका बजगाईंले विभिन्न राष्ट्रिय तथा अन्तर्राष्ट्रिय पुरस्कार र सम्मान प्राप्त गर्नु भएको छ । उहाँका नियात्रा त्रिभुवन विश्वविद्यालय, पूर्वाञ्चल विश्वविद्यालय र लुम्बिनी बौद्ध विश्वविद्यालयको स्नातक तहको पाठ्यक्रमा पढाई भइरहेको छ भने एउटा लघुकथा म्यान्मार(बर्मा)को नेपाली स्कूलमा कक्षा ९ मा पढाई भइरहेको छ । १३ कृतिका सर्जक बजगाईको ‘संवैधानिक पत्नी’ चौंथो लघुकथासङ्ग्रह हो । यस अघि उहाँका यन्त्रवत् (२०६४), रोडम्याप (२०६५), कवच (२०७२) लघुकथासङ्ग्रह प्रकाशित भएका छन् । ‘संवैधानिक पत्नी’ लघुकथासङ्ग्रहमा आजको नेपाली तथा डायोस्पोरिक जीवन र समाजको भोगाई एवम् अनुभूतिको जीवन्त प्रतिबिम्ब आएका छन् । उक्त सङ्ग्रहका कथामा नेपालको सामाजिक, राजनीतिक, आर्थिक, प्रशासनिक तथा प्रेम र यौनमा देखिने गरेका संगतिहिनाप्रति तीब्र ब्यंग्य छन् । धेरै जसो विवृत्त समापनमा टुंगिने यस सङ्ग्रहका लघुकथाहरु कौतुहलमय शैली, रोचक, घोचक, तीब्र र रहश्यमय पटाक्षेपका कारण आस्वद्य बनेका छन् ।