Yuddha Lade, Cancer Jite

दाङमा जन्मिएकी उनी एसएलसीपछि अनमी पढ्न चाहन्थिन् । फर्म भर्ने अन्तिम दिन राप्तीमा ठूलो बाढी आयो; रुइदै-रुँदै घर फर्किइन् । आईए पढ्न घोराही पुगिन् । चिठी पुऱ्याइदिने बहानामा उनलाई विद्रोही माओवादीसित पुऱ्याइयो । त्यसपछि उनी कस्ता-कस्ता मोड हुँदै गुज्रिइन् ? पुस्तकमा कहालीलाग्दो/कहानीलाग्दो वृत्तान्त छ । युद्धकालभरि प्रशस्त डायरी लेखेकी लीलाको लेखन कर्ता होइन; साक्षीभावमा छ । जे भोगिन्, सो सोअनुसार उतारेकी छन् । इतिहास लेख्नेहरूले झिनामसिना लागेर नै होला, बेवास्ता गरेका महिला-महिनावारी-माया-मातृत्व, करुणा-कैशोर्यजस्ता विषय पनि यहाँ छन् । 'पर्सनल इज पोलिटिकल', राजनीतिक व्यक्तिको कहानी झन् व्यक्तिगत मात्र हुने त कुरै भएन । पटक-पटकको मृत्यु जितेकी लीला फेरि क्यान्सरसँग जुध्नुपर्यो । तर, उनले त्यसलाई हिम्मतसाथ जितिन् । रसमय भाषामा लेखिएको लीलामय जीवन-संस्मरण रोचक छ ।